У цэнтры пазашкольнай работы прайшло адкрытае пасяджэнне круглага
стала. Прымеркавана яно было да 20-годдзя грамадскага аб’яднання
"Беларуская рэспубліканская піянерская арганізацыя” (БРПА).
- Дзень нараджэння піянерскай арганізацыі ў краіне адзначаецца штогод, -
адзначыла старшыня Навагрудскага раённага савета ГА "БРПА” В.В. Ліс. – Сёлета ж
гэта адбываецца асабліва маштабна. Так, на рэспубліканскім свяце пабывалі 26
піянераў-актывістаў з розных гарадоў нашай вобласці. Дэлегатам Навагрудка стала
вучаніца СШ №1 Т. Мянчыцкая. Таксама неўзабаве на свята ў Гродна адправяцца 8
актыўных піянераў.
Безумоўна, можна толькі парадавацца за рабят, якім выпаў шанц пабываць на
рэспубліканскім і абласным святах.Аднак, мяркую, мясцовая ўрачыстасць не
саступіла ім па многіх параметрах. Тое, што яна атрымалася і цікавай, і
вясёлай, могуць пацвердзіць усе, каму давялося на ёй пабываць.
На мерапрыемстве сабралася нямала гасцей. У ліку самых
шаноўных – ветэраны піянерскага руху і былыя
піянерскія работнікі В.І. Данько, А.Б. Сталярчук, А.І. Максіменка,
Л.А. Вагіна, Т.І. Калясінская і інш. Прыемна было бачыць, што і сёння яны
поўныя творчай энергіі, жыццёвага задору і аптымізму. Таму сустрэча з піянерамі
былых часоў была для сённяшніх школьнікаў карыснай: яны бліжэй пазнаёміліся з
людзьмі, з якіх смела можна браць прыклад. Прычым кожны з гасцей узгадаў
уласныя піянерскія часы, падзяліўся думкамі аб сённяшнім дні БРПА, выказаў
прапановы.
Не менш цікава было
слухаць і піянераў ХХІ стагоддзя. Пераканаўча і з задорам яны расказалі пра
справы, якія іх аб’ядноўваюць. Красамоўна сведчыў пра іх і рознакаляровы стэнд
са шматлікімі фотаздымкамі, спецыяльна падрыхтаваны да круглай даты.
Не засталіся ў баку і сябры БРПА – раённы савет ветэранаў і райкам ГА
"БРСМ". Самыя актыўныя ўдзельнікі піянерскага руху былі адзначаны
гэтымі арганізацыямі і атрымалі ўзнагароды.
Кропку ва ўрачыстай сустрэчы паставіла вядомая піянерам розных пакаленняў песня
аб першым піянерскім атрадзе.
|